MANIFIESTO DE SOA-Intersindical de Aragón

Que a crisis la bosen os que l´han chenerau, a banca y os interpresaires.

Iste 1er. de mayo, biene tacau por a crisis en a que ye meso o sistema capitalista, ye dizir, o sistema que esfiende que bels poquez (mena interpresarial) machacan á la gran mena d´a poblazión (treballadors/as), en gananzia suya, con l´unica fin d´adibir toz os diyas o suyo erenzio presonal.
Un sistema capitalista que no mai s´imple con as gananzias que quita y, ta ixo no dandalía en estricallar a natura, l´aire que resollamos y, mesmo o propio chenero umán.
No podemos xuplidar que os puliticos son os chestors publicos d´o capitalismo, emplegando os diners de toz/das, a lechislazión laboral y sozial y, os cuerpos de seguridá y orden publico, ta enfortir o sistema.
Dende que l´añada zaguera a crisis capitalista rebentase, a suya enampladura ha íu crexendo y, millonadas de treballadors/as en padezen en carne propia. Os espediens de regulazión d´emplego, en muitos casos d´interpresas que ni sisquiera han perdidas, son quizau a cara més beyible d´ista reyalidá, pero sin de xuplidar nos d´os/as treballadors/as temporals espachaus/das, ni de l´acotole d´emplego.
Bi ha que chusrayar que, en muitos casos, son aprobeitando a situgazión ta prebar de fer chantaxe puro y duro, á la fin d´aconsiguir cambear as condizions laborals replegadas en combenios bichens, lo que se traduz en fer més chornada, cambeos en a mesma, u conchelazión en as pagas.
Semos debán d´una crisis finanziera y de produzión que á bonico s´en ye ita ficando en toz os puestos d´a soziedá. O capitalismo s´en ye íu alazetando añada zaga t´añada en una economiya bertual, en a especulazión de baluras bursatils y d´o sulero, en a empeñadura sin de mugas d´as economiyas parentellars, y ha contrimuestrau estar un chigán con piez de bardo.
L´autual crisis capitalista ha contrimuestrau que se puede estar un furtador de guante blango sin de medrana á aber-ne de bosar. En cheneral, os alters executibos y cherens, que han a responsabilidá direuta d´o esbarre y furto de milentas de millonadas, no´n han abiu d´ir ta os chuzgaus, en a suya contra no s´han ubierto causas penals, as riquezas que en han aconsiguiu grazias á las suyas malas prauticas no´n han estau espropiadas, sólo que bella eszeuzión en regle cheneral.
Asinas, os diners publicos que tanimientres dezenas d´añadas no bi han estau t´aduyar á la mena treballadera ta plegar ta una bibienda dinna, ta guaranziar una amostranza y una sanidá publica unibersal, unos serbizios sozials de calidá, u ta bosar pagas dinnas ta poder bibir, s´en son emplegando en granizas cantidaz ta sucorrer á las entidaz finanzieras, as compañas d´aseguranzas y, t´as grans trasnazionals d´a responsabilidá d´iste empandullo.
En l´atro costau, i son os 1.300 millons de treballadors/as (més d´o 43% d´o total) que ganan menos de 2 dolars diyarios en o mundo, més de 195 millons de presonas esqueferadas en o planeta, as dezenas de millons que s´en beyen forzaus/das á treballar de trazas penibles y periglosas ta la suya salú, os 200 millons de ninos/as chusmesos/as á la esplotazión laboral, as zentenas de millons de mullers que no pas beyen reconoxitas as fainas que desembolican y, á la finitiba, més d´a metá d´a umanidá que li fa manca cualsiquier mena d´emparo sozial.
En Uropa, son més de 16 millons y meyo de presonas esqueferadas. En o nuestro país, Aragón, a precariedá ha la traza d´achustes temporals engañuflosos, chornadas parzials y doples rans laborals, treballadors/as en precario, normal men con cara de muller, choben/a u inmigrán que ha bel ran més altero d´azidentabilidá laboral.
Debán d´ista situgazión, emos d´enfortir un sendicalismo con conzenzia de mena que luite por a esfensa d´un treballo dinno, unas condizions laborals y unas pagas feitas ta prebar de plegar ta una bibienda dinna. Que luite por l´acotoladura d´o sistema capitalista e imperialista mundial como que espanyol, que i son l´orichen d´a esplotazión d´o pueblo nuestro y d´os treballadors/as en que i biben.

Rebindicamos tamién o dreito á aber una bastida aragonesa de rilazions laborals (BARL) con plenas competenzias, desixindo ta o Gubierno d´Aragón as trasferenzias de treballo: puliticas pasibas d´ocupazión, ispezión de treballo, fundo de guaranzia salarial, trasferenzias d´a Seguridá Sozial, INSS, chubilazión, incapabilidá, etz.
Faborezer a tratadura coleutiba en a demba nazional, alzando o prenzipio de no bi asistenzia d´entre combenios coleutibos y ficando en o Estatuto d´os treballadors o dreito en combenios de demba aragonesa debán d´o estatal.
O 1er. de mayo ye un trango més porque a crisis capitalista, debán d´o silenzio d´os sendicatos estatals, mal clamaus “mayoritarios”, continará con a esferra d´os nuestros dreitos laborals y sozials. Ixe diya debe suposar a continazión d´as mobilizazions que semos desembolicando á lo luengo d´istos meses y que debe de i plegar enta una mobilizazión més rasmiosa.

Entalto a mena treballadera!. Entalto aragón libre y sozialista!.
Entalto a solidaridá entrenazional!.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

A %d blogueros les gusta esto: